Vivian Lamarque - Milan bruta bèla

PESS FRITT

L’è tutt el dì che sun chì a spettà la tua telefunada
stu chì me movi no stu chì inciudada
a pensà ai robb de ditt
a tutti i drin fu ‘n salt ma l’è la mamma
la zia ‘l diavul la cugnada te se mai tì.
Inscì a pensà ai robb de ditt u passà la matina
‘l dopomessdì la sera
e adess che ghè fora la luna
adess ghe la fu pu e alura alura
salti su in pè sul tavulin
me metti a fa mì fort drin drin
pussè fort driin cume ‘na disperada
e poeu disi pronto pronto e varda
te se propri tì che te me diset cume la va?
Ste me cuntet de bell?
E alura tutt’a’n tratt
me desmenteghi tutt quèll che te vurevi dì
de tutt quei robb me ven in ment pù nient de nient
ma devi truvà subit ‘n quaicoss
subit se no tì te diset bè ciau e te tachet su
devi truvà ‘n quaicoss subit eccu te disi
ier u cumprà di bei pèss d’un culur azzurrit ciar
e gh’u tajà via ‘l cu puarett la cua
gh’u dervì la panscia poeu i u lavà ben ben
i u passà nella farina bianca e i u fa fritt puarett
fritt.
Ti te diset ah sì, fritt?
e poeu te diset pu nient de nient
e anca mi disi pu nient resti lì imbambulada
cume i pess fritt, azzurrit.